九龍城寨之圍城|票房衝上香港華語電影第2位 胡子彤謝票被「粗暴式」求愛嚇窒

九龍城寨之圍城|票房衝上香港華語電影第2位 胡子彤謝票被「粗暴式」求愛嚇窒

港產動作電影《九龍城寨之圍城》雖然上映近一個月,不過熱度有增無減,截至星期一,香港澳門總票房已超過8250萬,更連續27日成為單日票房冠軍,成績超過《明日戰記》,榮登香港電影史上華語電影總票房第2位。

口碑載道嘅《九龍城寨之圍城》票房已經史上華語電影第二位

電影喺內地票房交已突破6億人民幣,有望成為2024年最高港產片票房。成績雖然咁好,而演員們亦加緊繼續宣傳,日前 黃德斌 同 胡子彤 就再現身戲院謝票,有女觀眾更激讚戲中飾演Tiger哥嘅德斌好有型,而佢亦話雖然電影已上映一段時間,但係見到有唔少觀眾入場支持,令自己非常感動。

黃德斌、胡子彤同張文傑繼續向觀眾謝票

日前獲 張文傑 拍片鼓勵,患先天心臟病嘅小朋友「小鐵漢」亦有到場﹐呢次佢就未有以「四仔」面罩造型現身,反而以胡子彤戲中嘅十二少造型登場,再加老虎公仔向德斌飾演嘅Tiger哥致敬。佢仲被呢日嘅主持問起一個兩難問題﹐要佢喺十二少同Tiger哥中二擇其一﹐佢佢變心話:「喜歡十二少,因為佢好好人。」

小鐵漢再次入場睇戲,仲移情胡子彤,非常搞笑

電影將劉俊謙嘅魅力發揚光大,爆發「劉太」效應,而其實十二少胡子彤一樣捧場客眾,呢日佢仲應觀眾要求即場演繹:「我冇跟錯呢個大佬﹗」之後就突然有女觀眾語出驚人求愛:「胡子彤做我條仔啦﹗」搞到佢嚇到目定口呆不知所措,仲尷尬到匿喺德斌背後。

 相關推薦

熱門搜尋