新片登海關巡邏船實景拍攝 學友霆鋒演緝私精英7月上映

邱禮濤 執導嘅新片《海關戰線》7月初就會上映， 謝霆鋒 喺新片擔任動作指導兼領銜主演，而 張學友  關智斌  衛詩雅 早前就特別到海關基地實地拍攝，其中一場重頭戲，學友率領 霆鋒 Michelle Kenny 等上船拍攝，事前又特別向專業人士請教要注意嘅細節，好似開船嘅手勢同專業名詞等，以求拍攝達可以有最完美效果。
當日戲份講述霆鋒、學友、Michelle、Kenny、楊天宇同朱天準備出海巡邏，開船前大家作好萬全準備，包括當日晚餐，算係戲中嘅輕鬆一場。
 
衛詩雅笑說：「頭先同學友哥對戲，佢問我今晚食乜餸？今日晚餐由我負責，我跟劇本回應佢話蕃茄抄蛋，大家有講有笑好似一家人咁，我們呢班演員感情好好，我仲私下買咗薯片『加餸』。」

雖然Michelle本身有船牌，不過登上海關船隻駕駛倉仲係首次，令佢即時感覺好有責任感，好似正維護法紀咁。而Kenny得知詩雅有船牌後就大表羨慕，仲乘機向專業人員追問過往巡邏經歷。

身穿制服嘅學友拎住望遠鏡，邊唸對白發號施令，甚有氣勢；而坐喺控制座嘅霆鋒就努力熟習面前嘅操控桿，表現專業。

霆鋒話：「呢日拍攝感覺好莊重，好似自己有一種責任感，同平時拍戲感受唔同；其實我本身好鍾意水上運動，自己水性比陸地活動更強，我仲成功考到初級救生員牌，一直都想考船牌，可惜冇時間，所以今次藉拍戲對船上操作同規條加深了解，他日真係考船牌相信會有所幫助。」