Startalk｜林智樂錄新歌遇聲帶失控 感謝父母狂Loop歌曲默默支持

上年正式出道嘅Felix林智樂，話咁快又推全新主打歌《年輪海》，好多人話過咗新人嘅蜜月期，第2年嘅樂壇之路會比較難行，但係Felix反而冇理會呢個常理，平常心憑感覺揀歌。雖然得20歲仔，但係佢依然敢於挑戰，推出講人生嘅新歌《年輪海》，呢日Felix作客《Startalk》接受主播 許文軒 訪問，分享錄製《年輪海》背後故事。

Felix大爆錄製新歌時，係人生中聲帶狀況最差嘅時刻，出席完連串頒獎禮，因為感冒等原因令聲帶唱歌時有障礙。甚至錄影節目《聲夢1+2》更發現自己聲帶失控，從前輕易而舉發出嘅氣聲全部消失，先令佢正視問題急急去睇中醫根治。

錄音時Felix雖然未係完美狀況，但監製Cousin亦幫忙以一些技術調整令新歌趕及限期錄好，Cousin更用特別嘅方式引導Felix唱出歌曲人生嘅味道，Felix透露：「Cousin叫我幻想好似喺樹下同一班小朋友講人生故事一樣﹐我即時有晒畫面，好容易就代入到歌曲嘅意境。」

講起當初參加《聲夢傳奇》時家人曾反對入行，Felix坦言自去年得新人獎後，家人態度開始軟化。父母喺屋企仲會默默狂Loop自己嘅歌曲支持。當年家人唔太支持佢入行其中一個原因係Felix仲未讀大學，而Felix亦承諾快將重回校園，希望留喺香港完成大學課程，進修音樂或市場學嘅學位，打好歌手嘅知識根基。