胡定欣關注埃塞俄比亞女性 為當地兒童送上關懷歡樂

胡定欣 年初時跟隨慈善機構到非洲國家 埃塞俄比亞 探訪，為咗確保女性婚前貞潔，喺當地一直盛行女性割禮嘅傳統文化習俗，即係女嬰喺7日大時，就會幫佢哋施行割禮。呢一刀唔單止為女性帶嚟切膚之痛，更會為佢哋心靈帶嚟永久創傷，定欣聽聞呢個傳統都覺得好心痛，雖然7日大嘅BB唔知發生咩事，但當佢開始對身體有認知時，女性嘅私處就已經被縫埋。

今次行程，定欣話好好彩聽到一位從事25年嘅割禮師分享，講到目睹呢個割禮儀式為女性帶嚟嘅影響，並且認為係時候要改變，不應該活喺呢個文化底下。定欣指慈善機構會向對方送一隻羊，希望佢以另一個方法去維生。

但係由於當地受氣候災禍影響，唔少人都三餐成疑，小朋友面對營養不足及冇機會入學問題，定欣除咗身為捐助者之外，亦帶同小玩意為當地小朋友送上歡樂。

近年工作放慢，定欣多咗時間去重新學唱歌，佢希望可以掌握到更好唱功，就實行以歌曲或歌詞去表達自己。