談判專家｜青雲鎮宇相隔19年再合作 兩大影帝合體鬥戲洗污名

由 劉德華 監製，邱禮濤 執導兼編劇， 劉青雲 吳鎮宇 領銜主演嘅新片《談判專家》，即將喺6月中上映！今次係青雲同鎮宇兩大影帝，相隔19年後再次合作，兩人在公在私都一樣熟稔，兩人好戲之人再次於大銀幕鬥戲，自然令唔少影迷都引頸以待喇。

飾演同樣係頂尖談判專家嘅主角卓文偉( 劉青雲 飾)為清洗被指謀殺同僚，仲有貪污案主謀嘅污名，不惜鋌而走險，成身佔領警署、挾持人質嘅綁匪。而由談判員改行任職社工嘅謝家俊( 吳鎮宇 飾)，突然被卓點名「講數」，兩人喺各為其主，連場「舌戰」之下，逐步揭開背後陰謀真相。

電影改編自1998年嘅荷里活影片《冇數講》(The Negotiator)，森姆積遜(Samuel L. Jackson)同奇雲史帕西(Kevin Spacey)嘅演出，被譽為係一套經典嘅雙雄電影，今次身兼編劇嘅邱禮濤就決定將經典作加入地道香港味重新詮釋。邱禮濤對原作極為欣賞，早喺2017年本已有機會翻拍，惟當時邀請開拍嘅著名製片家 崔寶珠 ，2019年離世後計劃被擱置，其後接手版權嘅聯瑞公司，再次邀請佢開拍，令機會再一次落入手中，Herman憶述：「當時由於之前幾部戲都係喺內地拍攝，《談判專家》可以全片喺香港拍攝，所以考慮咗幾日就接拍。」
 
全片都係喺香港拍攝，而幕前陣容亦係清一免全香港演員，電影百分百充滿港味。向來對時事觸角敏銳嘅Herman，亦透過今次執筆撰寫劇本，加入佢個人關注嘅社會事件，充滿佢對香港唔同階層嘅關懷。

「《談判專家》保留咗《冇數講》基本設定，而故事改成發生喺香港，必然要將本來唔匹配香港語境同情境嘅地方改編，電影裡加插香港曾發生過嘅社會事件所啟發嘅情節（如「郭阿女事件」），至於鎮宇飾演Kevin Spacey嘅角色，就改動佢由談判專家轉行做社工，可能係因為我自少就很欣賞同尊敬社會工作者同記者，佢哋對社會付出同承擔，好想喺在電影中拍佢哋。」
 
兩位主角青雲同鎮宇情誼橫跨40年，感情極之深厚。識於微時嘅佢哋，80年代初先後加入無綫電視藝員訓練班，一同成長互相見證對方成就。更逐漸由小角色，慢慢榮升到一線小生，後來又共同轉戰影圈。

佢哋電影上首次合作嘅係1994年嘅《神探磨轆》，其後再一齊演出《一個字頭的誕生》、《高度戒備》、《衝鋒隊怒火街頭》等經典港產片。而上屆金像獎頒獎禮，青雲更由鎮宇手上獲得第3座金像獎影帝，鮮有現身頒獎禮嘅鎮宇，據指仲係因為青雲有份角逐，先會接受頒獎邀請。結婚時又為對方擔任兄弟同伴郎，感情有幾深厚可想而知。
 
而作為佢哋影圈多年戰友嘅Herman，今次就特別安排比原作更多嘅戲份，等兩位影帝同場較勁，著墨集中喺兩人之間嘅情義，同惺惺相惜嘅關係，Herman話：「對我嚟講，青雲同鎮宇都係好好、好出色嘅演員，佢哋都有各自嘅個性。我都好鍾意睇戲，作為一個觀眾，我好想再睇到佢哋一齊喺同一部電影入面演戲。好幸運佢哋今次願意演出《談判專家》。」