校園騷解同學疑難Gin Lee被圍 鄧小巧教路夾胳肋底解緊張

Gin Lee  泳兒 鄧小巧 許靖韻 黃明德 洪助昇 同新人 曾傲棐 一齊現身一個校園巡演活動，當晚除大家同大家唱歌之外，亦同台下同學們大玩遊戲，又分享自己面對逆境時處理嘅方法，希望藉此鼓勵年輕人。雖然參與咗首場演出嘅 張敬軒 雖然這次未能出席，但亦拍片為學生打氣，十分窩心。

當晚首先出場的Vincy唱出新歌《撞到正》，當唱到副歌時，觀眾仲配合大叫歌詞中嘅「鬼」字，全場氣氛熾熱。隨後佢又獻唱近年暗黑系列代表作《溝渠暢泳》，Vincy又公開面對負評嘅方法：「所有好同唔好嘅comment我都會睇，因為我想自己進步，同埋亦都係氣度嘅問題，要慢慢去磨練，咁你就會識得去過濾一啲唔應該要聽、或者邊一啲係可以令自己進步。」

Vincy獻唱新歌時獲台下同學大力應援

有同學就向小巧問到，克服唱歌比賽因而失準嘅方法，小巧就指就算舞台經驗十足於台上一樣會緊張，不過就認為可以練習而減輕，一講仲令全場大笑：「一位老師教我夾胳肋底，哈哈。夾實你嘅胳肋底，然後hold住呼吸， hold到再換氣為止，可能做十幾次，原意就係令你本身緊張嘅肌肉學識放鬆，所以我一陣準備唱歌，而家要夾吓先，哈哈。」

小巧嘅奇特減壓方法令大家都忍俊不禁

而Angela被同學問到當初大專選科問題時，佢就指當年完全冇呢煩惱：「我會考同A-Level嘅時候已經諗定，如果讀大學嘅話，我會揀finance呢個方向，所以當時好快就揀咗。但我知道好多同學仔去到DSE都未知道或者未決定大學想讀乜嘢科，其實唔緊要，因為仲有青春，仲有時間，可以諗。」

Angela就被問到大專選科問題

Gin Lee呢晚壓軸出場，演唱新歌《告別媒氣燈》同《企好》時，仲到台下同觀眾自拍。到歌曲結束後，亦因為觀眾熱情包圍而寸步難行未能返回台上。之後被同學問到生於音樂世家嘅佢，會否因為父母期望而感到壓力時？Gin Lee坦言自己比較幸運，父母未施加壓力，只要求佢一件事，「叫我揀定一樣嘢就要全心去做。回應呢位同學仔，如果本身有天賦，我覺得係可以嘗試去發展一下；但如果冇乜嘅話，可能要同你屋企人溝通，或者可以propose：『我覺得自己嘅天賦喺另外一方面，會唔會我都可以嘗試吓行過一條路？』真誠嘅溝通交流係最好。」

Gin Lee邊唱邊到台下，又感恩父母未予自己太大壓力