林嘉欣蒙古探訪不慎整傷腳兼低燒 親眼近距離觀看眼科手術

林嘉欣上月去到蒙古探訪患上眼疾嘅當地居民。去到當地兒童醫院探訪時，當嘉欣見到剛完成眼睛手術、未足月嘅BB，佢即時母愛爆棚，仲小心翼翼抱起BB細心呵護。而探訪一位患有先天性白內障嘅小女孩Marla時，嘉欣同Marla嘅媽媽雖然言語不通，但當感受到對方照顧小朋友嘅壓力時，兩人都講到眼濕濕，要伸手安慰彼此。
嘉欣喺醫院探訪一位患有先天性白內障嘅小女孩Marla。
今次係嘉欣首次近距離觀看眼科手術，佢坦言對血腥畫面有啲驚，但好開心小朋友可以康復，亦令成個家庭帶見到希望。而手術後嘉欣再次探訪小女孩，仲送咗份由香港帶嚟嘅小禮物畀對方。
嘉欣探訪患有眼疾嘅蒙古男孩時，情不自禁落淚。嘉欣去到蒙古包，探訪一位患有先天性青光眼及白內障嘅14歲男孩。
不過旅程嘅第二天，嘉欣就唔小心整傷腳兼低燒，不過佢就屆持參與每一個探訪，甚至仲去到崎嶇嘅蒙古包，探訪一位患有先天性青光眼同白內障嘅14歲男孩。呢位男孩年紀輕輕已經做咗十次手術，而男孩同家人嘅經歷同親情，更令嘉欣感觸落淚。
嘉欣主動提出戴上眼罩感受視障人士嘅黑暗世界。
呢次探訪令嘉欣深深感受到「看得見並非必然」，喺旅程中嘉欣主動提出戴上眼罩感受視障人士嘅黑暗世界，仲喺漆黑中同小朋友一齊玩。事後嘉欣表示：「原來摸黑生活，我會感覺到非常迷失，長時間如此我能夠想像是一個很痛苦的狀態，會被冷落，無法參與，無法擁有一個正常社交的童年生活……」

嘉欣又指今次令佢了解到蒙古偏遠嘅省份可以有醫生睇唔係一件易事，所以覺得香港人可以喺一個安全環境生活，的確係身在福中。