肥媽電台受訪分享從小刻苦過去 馴夫有術全因首任丈夫破裂關係

肥媽電台受訪分享從小刻苦過去 馴夫有術全因首任丈夫破裂關係

Maria Cordero 接受電台訪問，同主持 譚玉瑛 何基佑 仲有 麥皓兒 分享兒時艱苦經歷，仲分享同已故丈夫嘅溫馨點滴仲有「馴服」老公嘅方法，譚玉瑛都忍唔住話女人都要向肥媽學習。

肥媽日前接受電台訪問，分享過往經歷

年屆70歲嘅肥媽，年僅7歲就當家，年紀細細已肩負養家同照顧7兄弟姊妹嘅責任，當時每日以五毫子買餸，盡絞腦汁如何打釜頭，仲會去摘鄰居生果出售賺零用錢。肥媽指自己11歳就問人借身分證到工廠打工，又同家人一齊穿膠花賺錢：「我賺嘅錢去到15號就冇晒，出糧個糧袋都未返屋企就拎去還錢。自從有咗信用咭啲人係冇信用，我哋以前冇信用咭但好有信用，唔會走咗去，自從有咗信用咭，啲人可以宣布破產就唔還。」

肥媽80年代喺廣東道嘅的士高獻唱，當時梅艷芳同草蜢等歌手都會出沒，唔少人亦事無大小拜託佢幫忙，令佢尤如一個媽咪一樣，仲自始被封為肥媽：「有人生暗瘡，叫我幫佢點一點，有人有口氣，我就煲啲涼茶、湯水畀佢哋飲，又成日勸佢哋唔好飲咁多酒，呢個係阿媽嘅習慣。羅君左話我成個阿媽咁、又肥，所以就叫我肥媽，由佢開始叫，之後個個都叫我肥媽。」

呢日仲提到「肥媽」呢個稱號嘅由來

自小刻苦嘅肥媽她賺到第一桶金時，就豪氣買一隻精工錶予自己作禮物：「我成日叫人睇，人哋鬧鬼我，又唔係『勞』，依家隻錶仲擺喺保險箱，我攞嚟睇覺得好驕傲，養埋6個小朋友，仲可以買嘢畀自己，正所謂『有食冇食，都要有隻滴滴(手錶)』。」

肥媽又指天關掉你一扇門，一定會為你打開一扇窗，就如首段婚姻破裂後，就遇到第二任丈夫施曉洋(Ricardo Manoel 'Rick' da Silva)，兩人結婚多年非常恩愛，可惜Rick年前因肺腺癌病逝，令肥媽傷心欲絕。

肥媽同已故第2任丈夫Rick一直恩愛，秘訣原來緣於首段婚姻

兩人過去有唔少甜蜜快樂時光，肥媽提及丈夫依然一臉甜蜜：「我喺我老公面前連過馬路都唔識，我會話『老公，好多車點各算呀』，咁佢男人嗰種英雄感就出嚟，所以佢成日拖住我隻手。」

肥媽兒孫滿堂，每年都會抽時間共聚

譚玉瑛喺節目中亦請教肥媽嘅馴夫術，佢就話：「係我第一段婚姻嘅錯，我咩都理，令到我前夫乜都唔做，淨係出街玩唔做嘢，冇做丈夫同爸爸責任。小朋友唔尊重佢，我哋成家人好開心食飯，佢一返到嚟成張枱反咗。佢做唔到主角，冇咗做爸爸尊嚴，離婚時佢同律師講，話我好專制，每日早餐都唔同，我以為我係完美老婆，原來佢只需要一杯咖啡同多士，所以有時女人要扮吓儍，唔好咁叻，每一個男人天生想保護女人！」