關智斌首次巡迴六站結束 開騷前例牌暴雨如雨神

關智斌 早前舉行入行首個巡迴演唱會《關智斌時光機巡迴音樂會》，日前於北京舉行最後一站演出。Kenny仲為最後一站歌迷送上驚喜，以「限定金毛look」現身。而歌單亦係精心挑選，由《LALA世界》、《一起喝采》到《眼紅館》、《日月》等應有盡有。

Kenny近日完成首次個人巡唱嘅演出

Kenny呢次巡迴先後喺中山、佛山、上海、廣州、成都及北京同演出後，加上北京最後一站正式圓滿結束。呢6站巡演對Kenny係一個極大嘅學習過程，坦言甚少演唱會製作經驗嘅佢，今次籌備過程就遇上唔少挑戰，好似編排歌曲、音樂製作、到搵適合樂隊等等：「因為成個演唱會唔係淨係唱幾隻歌，要好流暢，要有起承轉合、要有主題、中間點樣同觀眾互動等等，呢啲反而係我喺《披荊斬棘的哥哥》呢個節目入面學到返嚟，學到點樣帶動觀眾嘅情緒，完全沉醉喺個氛圍入面。我目標好明確，淨係想我每一首歌都帶到一個意思，可以令到佢哋離開嘅時候都會回味。」

佢仲認為呢次籌備過程係好好嘅體驗同學習

Kenny又坦言每一場演出都非常難忘，期間Kenny因工作關係要飛到瑞士出席活動，活動完成就要即時飛返上海：「jetlag未完全回復就已經要去表演，都擔心自己嘅精神狀態唔好。」

不過最大挑戰其實係天氣問題：「我每一次開show當地都會落雨，我未到之前係陽光普照天氣好好，但到我一開show就會傾盆大雨，第二日又好天返，所以呢一樣嘢我係幾深刻，深刻嘅係因為我都好擔心令粉絲辛苦奔波。」

不過多次一抵埗就狂風暴雨，就令佢非常心痛歌迷喇

其中廣州一站，開show日就遇上大暴雨同龍捲風，歌迷於場外準備嘅應援物都要收起：「有好多人因為要趕車、趕飛機，好多延誤，令到佢哋失咗好多預算，甚至乎淋雨淋到成身濕晒，呢個我係幾心痛，因為我知道佢哋好多都係女仔，嚟到都唔容易，希望我下次去開show嘅場館，出面會有多啲嘅地方可以俾觀眾避雨啦。」