伍允龍期待再拍電影後傳 楊盼盼樂意教孫女功夫

人氣急升嘅 伍允龍 同埋啱啱榮升做 婆婆 嘅楊盼盼，呢日一齊出席講座分享練武經驗，Philip喺新戲飾演大反派王九，表現超乎水準，唔單止人氣急升，更獲舊愛鍾嘉欣大讚兼送祝福，Philip知道覺得好感恩。

講到早前導演宣布開拍電影前傳同後傳，Philip都話好期待，佢表示前傳唔涉及自己嘅戲份，而後傳嘅焦點就落係城寨四子嘅故事。佢話有次同導演出席謝票，有觀眾表示好喜愛王九一角，所以想知道後傳王九會唔會出現？導演表示好希望再同Philip合作，但再次合作嘅話，就可能係以另一個角色登場，Philip表示只要導演揾佢，佢都好樂意再參演。

Philip因為拍呢部戲而有唔少意外收穫，佢更估唔到戲中嘅造型，竟然被觀眾誤以為係郭富城，Philip都話有啲受寵若驚，佢話有啲造型以及角度，的確有少少城城嘅影子，可以同大帥哥相提並論，佢都覺得好開心。

至於盼盼姐嘅大女去年年初出嫁，今年三月榮升人母，呢排湊孫為樂嘅盼盼姐，講起孫女都開心到見牙唔見眼，佢仲話孫女雖然只係得兩個月大，但已經聽得明佢講嘢，佢仲話等孫女大個，好樂意教佢功夫。