電影泉攻略｜麥沛東 林雪聲演《加菲貓》新片 《玩轉腦朋友2》試映會戲院變大腦總部丨EP105

王鎮泉 Jeoffrey 每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。
 
之前介紹過大食懶加菲貓即將有新電影推出，會由加菲貓細細個開始講起，而最近官方都滲多咗少少劇情出嚟，今次加菲貓同阿的食食下宵夜，突然被神秘敵人綁架，仲因為咁加菲會重遇護失散多年嘅爸爸阿肥，展開一場搞笑嘅野外冒險。

睇動畫電影唔少人都會睇廣東話配音版本，除咗親切啲之外，有時啲gag用廣東話講都會更加有味道。今次《加菲貓：勇闖世界》搵嚟麥沛東同林雪聲演，齋聽陣容就知道好笑啦！
 
本周新片有：
《魔胎》：童貞修女被邀請由美國遠赴意大利郊外嘅修道院侍奉神。期間佢意外發現自己奇跡般無性受孕！而佢懷孕後身邊人對佢態度大變，怪事仲接二連三發生，到底佢懷嘅係神聖恩典，定係邪異詛咒？
 
《隊冧全世界》：細佬一家遭到暴君殘殺，執返條命嘅佢逃入叢林，遇到一位神秘薩滿。雖然細佬又聾又啞，但薩滿都係將一身武術絕學傳授畀細佬，令佢逐漸成為無敵嘅殺人機器，更加入地下反抗組織，誓要暴君血債血償。但當細佬殺得性起時，卻發現薩滿同暴君隱藏住不為人知嘅秘密。

 《詭異之家》：專拍神秘事件的YouTuber受朋友所託調查一間擁有古怪間隔嘅舊屋，於是佢搵嚟鍾意神秘學嘅建築師協助分析平面圖。他們陸續發現平面圖上「細思極恐」嘅詭異細節，與此同時喺「詭屋」附近發現一具棄屍，喺一步步調查下，有更多謎團同背後嘅黑暗真相亦隨之浮現。

2015年迪士尼同PIXAR推出咗一部動畫電影《玩轉腦朋友》（Inside Out），相信當年整喊唔少觀眾，當時呢部動畫就奪得奧斯卡同金球獎嘅最佳動畫片殊榮，仲有成8.58億美元票房。相隔9年續集《玩轉腦朋友2》終於喺今個暑假就要推出喇！

除咗5位原有情緒繼續登場外，仲有好多新嘅情緒角色會進駐韋莉嘅大腦總部，好似有成日焦慮嘅「阿焦」、最鍾意羨慕人嘅「阿羨」、出名厭世嘅「阿厭」、大大隻隻嘅「阿尷」，到底佢哋會為韋莉嘅大腦帶嚟啲咩變化呢。

電影公司早前就搞咗個試映會，率先播放咗35分鐘嘅片段。呢個試映會喺全球唔同地方都有舉行，而香港呢邊就好有心思，將現場佈置到好有腦朋友嘅感覺，仲請嚟「阿樂」同「阿愁」嚟同大家打卡。放映會入面，坐位上仲放咗好多唔同顏色嘅「記憶球」，現場唔少觀眾都睇住韋莉步入青春期，大家仲睇到眼濕濕呀！

票房龍虎榜：截至5月29 號中午，第三位《猿人爭霸戰：猩凶帝國》，第二位《芙莉歐莎：末日先鋒傳說》，第一位《九龍城寨之圍城》。