福祿壽訓練學院｜詹瑞文任評判免費贈學員秘訣 與王祖藍兩代扮嘢王聲畫合演

阮兆祥、王祖藍同李思捷三位Professor主持嘅扮嘢真人騷《福祿壽訓練學院》賽程激烈，今個星期日(6月2日)會繼續一對一對決，節目組邀請到即興之王詹瑞文(詹Sir)做評判，詹Sir喺台上即場技癢示範扮演黃凱芹，但佢就自嘲唱歌非強項，叫祖藍獻唱，兩人達到聲畫合一嘅搞笑效果，祖藍嘅聲線真係扮得好神似。

為節目任評判嘅詹Sir笑言平時學習演技要交學費，有投資同付出先會有收穫，今次難得免費分享畀意見學員，仲列出三大貼士敎人模仿要訣，包括形體、神似及聲線，最後要加上表演者個人魅力，先有助事半功倍。詹Sir更大讚節目三位主持扮嘢好犀利，各有特色同技術，最好可以大家一齊合力做騷，帶更多歡樂畀觀眾。

Tean Sau再次派出馮彥中扮演黃家駒，而上一輪被淘汰嘅黃潤成亦返嚟助演，由於佢本身都係一個BAND仔，玩咗音樂20年，喺TVB藝訓班七年期間，佢都有幻想過可唔可以真正喺錄影廠Rock and roll，可惜一直都冇機會，所以今次回歸《福祿壽訓練學院》舞台，以夾BAND形式出演，對黃潤成嚟講係圓夢感覺。好友關嘉敏、郭浩皇同林妍都希望有復活賽，令黃潤成有機會回歸。

Team Luk嘅劉倬昕亦換臉帶上頭套扮演一位高官，除咗外型之外就連聲線說話腔調都似模似樣。