2024TVB節目巡禮｜巾幗梟雄之懸崖率先睇 馮盈盈郭柏姸組魔音天團追歌手夢

《2024 TVB 年中節目巡禮》盛大舉行，一眾小生花旦個個都著靚靚現身赴會，包括有陳豪(阿Mo)、黎耀祥、譚俊彥(Shaun)、胡定欣、張曦雯(Kelly)、郭柏姸(Rosita)、林夏薇(薇薇)、馬國明、黎諾懿等，一齊向客戶們推介未來會登場嘅皇牌劇集以及綜藝節目。喺皇牌劇集方面有唔少人氣系列續集，包括《痞子無間道》、《巾幗梟雄之懸崖》、《法證先鋒VI倖存者的救贖》、《企業强人》、以及楊茜堯衝擊視后之作《黑色月光》、馬德鐘以及眾年輕演員出演嘅《非常檢控觀》、《異空感應》同埋《反黑英雄》，陣容同卡巿強勁。

《企業强人》嘅兩大男主角阿Mo同Shaun解構佢哋劇中關係，除咗兄弟情仲有敵人、老闆下屬等錯綜複雜嘅感情。定欣冋祥仔已經第八度合作，今次主演《巾幗梟雄之懸崖》箇中造型及角色人物從未曝光，喺巡禮上終於揭開神秘面紗，定欣坦言出演角色極大挑戰，因為當年劇集系列令人深入民心，自己都不敢怠慢要強化自己去演出角色，並透露佢係飾演一位1920年代叱吒風雲商界嘅女強人。而祥仔雖然多次同定欣合作，但每次劇種不同，變化好大。

薇薇喺《黑色月光》要扮演一個暗黑角色，拍攝過程令佢情緒好崩潰，身旁嘅馬貫東同何廣沛都戥佢辛苦，仲爆薇薇頻死邊緣下完成戲份，所以薇薇話劇集無論故事同內容都好值得支持。

綜藝方面口碑叫嘅吃貨系列同守護生命嘅故事會回歸之外，兩大皇牌選秀節目《聲夢傳奇》以及《中年好聲音》亦會舉辦第三季。喺TVB有兩大魔音封號嘅女神馮盈盈同郭柏姸，唔介意將弱點曝露人前，仲會拍成節目《魔音天團》紀錄一吓佢哋嘅進程。盈盈覺得魔音係一個好有記憶點嘅特性，Rosita就話一直以嚟只係冇時間裁培，未來觀眾可以睇到佢哋成長褪變，兩人更笑言話唔定之後可以出道做歌手，向歌手夢進發，甚至參加公司歌唱比賽。

馬明同諾懿雖然暫時未有新作品同觀眾見面，但佢哋都悉心打扮嚟見客戶，諾懿仲因為著咗一對加高鞋，突然高人一等，搞到馬明要抬高頭望佢，場面搞笑。諾懿話希望公司開一個節目畀馬明同老婆湯洛雯。

早前方皓玟(小明)作客音樂節目《J Music》同冼靖峰合唱，有網民發現兩人互動有曖昧氣色，仲話佢哋喺節目過後約會，疑似發展相差18歲嘅姊弟戀，Archie一臉無奈否認事件，指當日食飯仲有一班人，傳出緋聞後佢都有搵小明，互相對事件感到驚訝，大家都有澄清。另外男團LOONG 9 會喺6月舉行首個出道粉絲見面會，成員之一嘅Archie相當期侍，希望以最好狀態見粉絲。