2024TVB年中節目巡禮盛大舉行 譚輝智玩攤位遊戲展現神乎其技

2024TVB年中節目巡禮盛大舉行 譚輝智玩攤位遊戲展現神乎其技

2024TVB年中節目巡禮呢日盛大舉行,多套重頭劇集嘅小生花旦同皇牌綜藝嘅主持都有現身宣傳,同客戶近距離互動。場地設有八大攤位,小生花旦們邊推介節目,客戶仲可以同藝員們玩遊戲,朱敏瀚、黃子恆、何廣沛同陸浩明就率先試玩。

而一眾客戶去到中聲攤位玩遊戲,仲可以同唱將一齊jam下歌,包括李佳、羅啟豪、黃劍文等都有獻唱助興。而喺試玩遊戲途中,仲發現譚輝智原來係擲圈圈高手,自稱百發百中嘅輝智即場示範佢神乎其技嘅功力,一旁嘅古淖文忍唔住挑機,最後都只能夠敗走。

TVB Plus嘅皇牌節目《直播靈接觸》播出以來話題不斷,主持人梁思浩就預告,嚟緊仲有一位90年代嘅男神會登場,叫大家記住密切留意。

劇集方面,朱敏瀚同黃子恆就代表宣傳《痞子無間道》;陳煒同陳曉華就攜手宣傳《非常檢控觀》;而蔣祖曼同林正峰就負責宣傳《法證先鋒VI倖存者的救贖》,大家不約而同話好期待新劇出街。

至於四年一度嘅奧運,今年TVB都會繼續為觀眾轉播,黃庭鋒、鄭衍峰、劉穎鏇同何沛珈就會擔任今屆奧運主持,庭鋒話自己已經開始操fit,希望形象可以更符合;Leonard就話自己前兩個月已經事前去到巴黎拍節目,了解下奧運嘅籌備進度;而Tiffany同Roxanne就分享咗自己最期待嘅運動項目。

 相關推薦

熱門搜尋