林峯新戲大賣唔敢錫古天樂 兼顧歌手身份計劃開紅館騷

近期因為新戲《九龍城寨之圍城》人氣爆燈，成為流量密碼嘅 林峯 ，呢日暫時唔做陳洛軍，回歸林峯身份出席一個電動車活動，阿峯以Smart Casual西裝look亮相。講起揸車，阿峯話自己而家買車追求實用性，會以家庭車為主，因為平時如果得閒，都會揸車同老婆囡囡出去玩。

講起新戲大受歡迎，票房衝上香港有史以來華語片票房第2位，阿峯謙虛表示，自己只係做好演員本份，盡量達到導演要求，阿峯話：「冇預期過反應會咁好，真係好感動。」而問到如果票房衝上第一，會唔會如之前所講錫錫古天樂，阿峯就搞笑話：「要獲得佢批准先，我驚佢打我。」

阿峯預告下半年仲有新戲會上映，亦都會接拍新嘅影視作品，不過自己都好希望可以兼顧歌手身份，仲話好希望可以再開紅館騷，不過就要好好度期先可以開始計劃啦！