張學友巡唱台北站9場開鑼 小巨蛋送上國粵語經典歌

歌神 張學友 睽違6年，終於喺星期六重返台北小巨蛋舉行演唱會。學友以黑色皮褸登場，瞬間引爆全場尖叫。一開場學友就企喺升降台上演繹 《Ooh La La》，跟住一轉身企上復古跑車，同男女舞蹈員落力唱出《馬路英雄》。即刻炒熱現場氣氛。

之後學友連演唱《我應該》、《交叉算了》等經典粵語歌，雖然學友全場有差唔多一半歌係粵語歌，但台灣歌迷依然非常捧場，全晚氣氛熱烈。

演唱會當然唔少得學友嘅大熱國語情歌，《情書》、《一千個傷心的理由》等，令台下歌迷聽出耳油，喺演唱《又十年》嗰陣，背景仲播放學友由細到大嘅相片，等大家一同見證歌神一路嘅成長。為咗台灣歌迷，學友演繹完粵語歌《分手總要在雨天》之後，仲加碼同全場歌迷大合唱國語版《一路上有你》。

而演唱會最後喺全場大合唱《你最珍貴》，以及搖滾版《吻別》中落幕。學友將會一連三星期嘅周末喺台北小巨蛋打卡返工，總共9場演出依然一票難求，歌神魅力果然非一般。