徐澤昌開醫館獲中聲兩大評審撐場 開張前夜不忘直擊交通意外現場

曾為唔同節目擔任嘉賓、又參加過《中年好聲音2》而為人熟悉嘅大隻中醫師Roy徐澤昌，佢嘅個人醫館今日正式開張，除咗獲中聲兩大評判 張佳添 同 周國豐 撐場之外，仲請到著名時裝設計師 鄧達智 同開設個人健康頻道嘅 鄭丹瑞 做剪綵嘉賓。

Roy呢日亦悉心打扮以粉紅色西裝亮相，鄧達智仲即場點評Roy嘅衣著，大爆事前有問自己意見，阿旦就大爆Roy係自己見過最靚仔嘅中醫，而張佳添就爆Roy十足十佢家庭醫師一樣：「肥媽成日話唱歌嘅要食黨參補氣，當然要搵佢開靚黨參俾我，同埋佢中醫知識豐富﹐加上佢識中西合壁﹐有時佢會幫我同肥媽診症。」

曹敏寶呢日亦有帶埋囝囝支持，佢透露比賽期間全靠Roy幫自己止咳過關，依家無論中聲藍球隊成員同囝囝有唔舒服，都係向Roy求醫。Roy亦坦言因為參加比賽有更多朋友認識自己。

不過開張前一晚，醫館附近發生咗一宗嚴重交通意外，有私家車失控撞向消防局大門石柱，Roy都有即時了解：「大約12點我哋喺醫館趕緊裝修﹐突然聽到嘭一聲，知道醫館出邊撞車，我即時衝出去了解情況，睇有冇人受傷需要救治﹐或者需唔需要幫忙報警﹐但見到消防員已經救出被夾喺車中嘅傷者，冇咩可以幫忙﹐只可以錄低情況，睇吓有冇需要提供俾警方或者有需要嘅人。」