StarTalk一氣呵成版丨葉振棠點評周吉佩李佳歌喉 盼有機會與葉麗儀再開雙葉演唱會

現年80歲嘅棠哥 葉振棠 ，早前宣布咗佢首個紅館嘅個唱亦將會係佢嘅告別演唱會，呢日佢就作客《StarTalk》，同主播 許文軒 講下自己喺樂壇大半世紀嘅經歷。

棠哥話過去10年自己一直好想同 葉麗儀 喺紅館開到一個「雙葉」演唱會，佢又分享當年「雙葉」嘅由來，棠哥指雖然葉麗儀年紀比自己細，但對方反而好鍾意當佢係小朋友咁看待，加上因為知道棠哥視力唔好，所以每次開騷都會提點佢啲機關位喺邊。

棠哥指葉麗儀對音樂嘅要求好高，每次都要做到100分先得，對方仲會督促自己要唱好啲。講起「雙葉」演唱會，棠哥話呢個組合好少喺香港開騷，多數都係喺美加開多，但過去10年佢哋前後申請過8次，但都唔能夠成功申請到，令棠哥覺得好可惜呀。

去年棠哥身體抱恙，更令佢因而缺席《情牽煇煌經典演唱會》第二場嘅演出，亦因為咁而令棠哥感受到身體健康嘅重要性，佢又好感謝當時陳潔靈臨危受命幫佢頂上。

自言唱歌係自己生命一部分嘅棠哥，笑言雖然宣布咗紅館係佢嘅告別演唱會，但如果之後有啲關於慈善嘅、需要佢嘅佢都會繼續唱，棠哥指自己每日都會練歌，最少會唱兩個鐘，佢又指雖然唔會再開個人演唱會，但上台唱兩三首佢都OK嘅。

講到呢次做演唱會最大嘅難度，佢話係要記歌詞，因為自己眼睛唔好，唔可以靠提詞機，所以要將所有歌詞記晒入腦。

後生一輩可能唔知，棠哥年青時曾經夾過band做Base手，佢話當年夾band時就已經認識陳潔靈，當時佢哋因為夾Band日日都見，又會一齊去星馬、意大利、歐洲等地演出，所以感情就好似兄妹一樣。

出道至今有唔少經典作品，但如果要揀一首代表作，棠哥話一定係《忘盡心中情》，因為呢首歌去到世界每個角落都係曼受歡迎，唯獨喺中國內地就變成另一首歌《萬里長城永不倒》，棠哥話喺內地即使啲人認唔出佢，但都會識得呢首歌。

早前推出咗一隻慈善大碟，棠哥除咗搵返當年劇中主演嘅演員劉德華、張衞健等合唱外，仲搵嚟一班後輩歌手周吉佩、李佳合唱，棠哥大讚兩位後輩唱得非常好，同時又感謝葉麗儀讓出《笑傲江湖》呢首歌畀佢同李佳合唱。