劉威煌自爆曾眼紅許廷鏗重提公關災難 介意被封億萬駙馬：食軟飯就唔使工作啦！

劉威煌於2009年參加第一屆《超級巨聲》入行，當中得許廷鏗彈起，佢喺2017年轉行做生意，劉威煌去年年底回巢參加《中年好聲音2》，最後八強止步，今年3月自資推出新歌，劉威煌日前接受電台訪問，自揭曾眼紅許廷鏗，直言介意「億萬駙馬」呢個稱號。

劉威煌事業曾跌入谷底，參加《中年好聲音2》被太太反對。

劉威煌入行前係月入達約3萬嘅打工仔，決定放棄穩定收入簽約做歌手，劉威煌坦言起初機會比較多，後來開始冇咩嘢做零收入，劉威煌直言當年曾眼紅許廷鏗：「當時我係有眼紅有羨慕，點解人地咁犀利？」 劉威煌提到2010年發表「實力股」言論被指暗窒羅力威而飽受網民圍攻：「實力股事件係最先遇到嘅打擊，係公關災難，識我嘅人就會知我無惡意，我同羅力威後尾都係friend。我冇諗過撐A變咗攻擊B，證明自己當時好幼嫩。」

劉威煌去年年底回巢參加《中年好聲音2》，最後八強止步。

劉威煌一開始介意被指似周星馳電影反派角色常威：「嗰陣對我係幾大打擊。畀人叫『常威』好嬲，因為係反派，代入咗『衰人』兩個字，好想為自己平反。後來先知好正喎，個個都記得我，同古淖文比賽直接叫我『常威』，以前反駁係好傻，嗰陣我真係唔識網絡運作。」

劉威煌指太太於當年曾反對佢辭工入行，去年再戰《中年好聲音2》驚大家再受打擊。

劉威煌於2014年與拍拖7年嘅女朋友Sandy喺沖繩註冊結婚，女方被起底指其家住半山區，家族持有多個物業，劉威煌被網民封為「億萬駙馬」，表示仍介意呢個名：「介意係因老婆背景唔係網上所講咁勁，好困擾，因為事件涉及好多人，包括老婆同我嘅家庭，如果我『食軟飯』，就唔使工作啦！」劉威煌好感謝老婆18年全心全意對待，包括其硬頸性格，事關太太於當年曾反對佢辭工入行，去年再戰《中年好聲音2》驚大家再受打擊，而劉威煌就向太太坦白參加目的只係鍾意唱歌，自己會隨心努力做。
劉威煌自揭曾眼紅許廷鏗，直言介意「億萬駙馬」呢個稱號。