繁花|「寶總」胡歌高中未畢業已入行 事業高峯遇車禍重傷險死

繁花|「寶總」胡歌高中未畢業已入行 事業高峯遇車禍重傷險死

名導 王家衛 執導兼監製嘅《繁花》今晚就會喺翡翠台正式首播,仲係劇集喺內地以外首個電視平台播出。由真.上海仔 胡歌 主演嘅《繁花》,早前於內地播出時掀起一陣煲劇同旅遊熱,仲連酒店同餐廳都受惠於劇集風潮。

故事以90年代改革開放嘅上海作為背景,主演劇中「寶總」一角嘅內地男星 胡歌 ,早喺高中年代已經「入行」為電視台擔任主持同記者,畢業後更同步獲中央戲劇學院同上海戲劇學院同時錄取,不過佢就決定留喺家鄉升學,可以話《繁花》背景故事嘅見證人。

正宗上海人胡歌主演以上海為故事背景嘅《繁花》

而胡歌大專尚未畢業,2003年已經獲邀演出遊戲改編劇集《仙劍奇俠傳》,仲成為佢嘅首部代表作,又同時負責劇中幾首嘅歌曲嘅演唱。

可惜正當佢事業發展如日方中,就發生令佢一生留憾嘅意外,2006年佢同 林依晨 劉詩詩 等合作拍攝《射鵰英雄傳》期間,座駕遇上致命交通意外,事故導致佢嘅女助手離世、司機重傷,胡歌本人亦嚴重受傷,事後一度來港留醫治理。

早年佢拍攝《射鵰》時遇上車禍,劇集要緊急停拍

接受復康治療近年之後, 胡歌2007年正式宣佈復出,期間佢以意外內容所撰寫嘅《幸福的拾荒者》版稅捐予身故女助手家屬同行善,又以對方名義於雲南興建小學以作紀念。

當時胡歌亦身受重傷,養傷期間撰文著書提及自己嘅得著同啟發

復出後嘅胡歌未有因為休養而被大眾忘記,佢之後一直接拍多部唔同類型作品,又同時參演話劇、推出唱片,又著有幾本唔同主題嘅著作,香港觀眾對佢所主演嘅《瑯琊榜》相信印象最為深刻,當時於TVB播出亦掀起一陣追劇熱潮,相信今次亦會同樣受大眾歡迎。

佢參演嘅《瑯琊榜》令唔少人都印象深刻

胡歌曾公開承認曾同女星薛佳凝同江疏影拍拖,但係去年初胡歌突然宣佈已為人父,前年9月已與前經理人黃曦寧成婚,組成幸福家庭。

《繁花》將重現90年代經濟起飛嘅上海面貌

《繁花》 星期一至五晚 21:30 翡翠台

 相關推薦

熱門搜尋