莫文蔚54歲生日推新歌MV 沙特壯麗景色取景嘆為觀止

莫文蔚 趁今日生日，以限定樂隊「The Masters」成員名義，推出新歌《一身焰火去羅馬》，更公開早前到沙特阿拉伯拍攝MV嘅神奇過程。月中將會於北京鳥巢舉行全新巡演，又成為首位喺鳥巢開唱嘅華人流行女歌手。

「The Masters」繼出道曲《豹變》之後，趁Karen嘅54歲生日推出新歌，樂隊成員 李銖銜 除咗擔綱音樂製作人，仲特別邀請韓國知名人聲錄音大師 MAXX SONG 拔刀相助。

Karen生日推出新歌《一身焰火去羅馬》

Karen早前就為拍攝MV，特地前往沙特阿拉伯綠洲城市AlUla(歐拉)取景，不過過程就非常困難，而MV中拍攝古城夜景片段，就遇到當地開齋日，男女老少都齊齊走上街頭，又有阿拉伯音樂表演，猶如《一千零一夜》故事中一樣。

拍攝MV過程亦一波三折

MV拍攝時間接近開齋日，景區一票難求，原先以為無緣取景嘅Hegra遺址，突然因為其他旅客因故取消，而意外得到拍攝機會，當日Karen喺顛簸嘅吉普車上淡定化妝整頭，一路上「兵荒馬亂又井井有條」咁準備，抵達遺址時整個團隊更被眼前美景震懾。