重溫佘詩曼十大經典角色 釘姐君好花家姐邊個係你心水

視后佘詩曼嘅演技相信冇人會質疑，從影27年佢演過唔少角色，今日我哋就喺佢演出嘅40多套劇集入面，嚴選出10大經典角色，一齊重溫阿佘嘅精彩演出！

《十月初五的月光》祝君好 （2000年） 
銀雞聲一響，相信會即刻勾起唔少觀眾嘅回憶。當年《十月初五的月光》曾經錄得最高46點，刷新咗當年香港電視收視記錄，仲獲得「亞太電視大獎最佳連續劇」獎。君好同初哥哥同呢對CP又甜又虐，觀眾雖然睇到勁心噏，但係都要晚晚準時返屋企追劇！

《西關大少》何雙喜/夜香妹 （2003年） 
延續佘詩曼同張智霖呢對CP，護士兼係倒夜香工人嘅何雙喜，同廣運行太子爺周天賜喺劇中係一對歡喜冤家。雖然雙喜成日畀天賜整蠱，但佢都不甘示弱，會同返天賜嘅爸爸、劉松仁飾演嘅周明軒篤背脊。

《金枝慾孽》董佳•爾淳/爾淳小主（2004年） 
被網民封為宮鬥劇嘅始祖，當年《金枝慾孽》播出時唔只引起追劇潮，喺劇集播完之後，唔少劇迷仲買埋碟嚟方便重溫。雖然劇中個個各懷鬼胎，但無絕對嘅惡人同好人，而開始畀人覺得奸計多多嘅爾淳小主，最後嘅反轉令觀眾睇得津津有味。

《絕代商驕》林淼淼/三水妹 （2009年）
佘詩曼飾演嘅林淼淼，因為收數而同黃子華飾演嘅麥提爽而認識，由於麥提爽自細就好有商業頭腦，所以視錢如命嘅三水妹就要拜對方為師。呢套劇有唔少金句，加上輕鬆搞笑，唔少網民都想原班人馬開拍第二輯。
 
《宮心計》劉三好（2009年） 
「做好事， 說好話，存好心」呢句劉三好嘅經典對白，當年周街都可以聽到。三好同姚金鈴嘅宮鬥場面，二人由前主子兼好姐妹，到之後反目成仇，唔少觀眾睇到咬牙切齒。

《公主嫁到》昭陽公主（三公主）（2010年）
佘詩曼憑演昭陽公主一角喺香港同海外同時奪得多個獎項，當中包括第16屆亞洲電視大獎「最佳女主角」、第六屆首爾國際電視節「觀眾投票最高人氣獎」、馬來西亞雙料視后等。而阿佘同陳豪喺劇中嘅搞笑演出，更加令觀眾眼前一亮。
 
《花花世界花家姐》花麗珠/花家姐（2011年） 
「嘩～真係唔簡單呀！」花家姐嘅口頭蟬，同時亦成為當年大眾嘅口頭蟬，而劇中花家姐設計嘅Pig Pig豬，亦被製作成小禮物，喺宣傳活動中送畀大眾。
 
《天與地》葉梓恩/阿Yan（2011年）
被香港網民譽為「神劇」，劇中有唔少金句，而《天與地》喺播出後嘅隔年「萬千星輝頒獎典禮2012」，喺首次全民投票方式下，獲得逾8萬票成為民選嘅「最佳劇集」 。

《使徒行者》丁小嘉/釘姐（2014年） 
佘詩曼憑演釘姐呢個角色，創下同時奪得多料視后嘅記錄，佢喺劇中嘅演出亦成為經典，當中釘姐知道三個阿媽死咗嘅一幕，佢崩潰嘅表現令觀眾讚不絕口。另外，佢同林峯亦被封為經典CP。

《新聞女王》文慧心/Man姐（2023年） 
被網民戲稱係職場版嘅宮鬥劇，觀眾睇住文慧心由一個小記者，慢慢升到去SNK News首席女主播嘅位置。劇中Man姐唔只集集爆金句，佢嘅「新聞女王」霸氣更加令觀眾讚嘆不已，有網民仲指阿佘唔只充滿壓場感，仲讚佢連眉毛都係戲呀！