韋綺姍胡渭康聯同《中聲2》唱將開騷 顏米羔身兼攝影師影宣傳海報

韋綺姍 文佩玲 同《中聲2》唱將 涂家堯 顏米羔 黃劍文 劉威煌 鄭梓浩 等，早前應 胡渭康 邀請，一齊擔任義工兼為慈善騷演出，呢日佢哋出動私伙，執到四四正正為慈善騷影海報。阿康話，今次個騷有好多message喺當中，希望回饋社會之餘，仲可以借呢個騷衝出香港，最好就可以變成一個巡迴騷。

米羔近日不時發揮專長影宣傳海報，今次佢又身兼大會海報攝影師，Rita老師話，之前曾經見過米羔幫譚輝智影嘅相，令佢一直希望可以邀請佢幫自己拍攝，今次終於如願以償。而身兼雙重身份嘅米羔就話，多得大家嘅配合，呢輯相先可以好順利完成。

今次能夠將自己鍾意嘅歌唱結合行善，一班《中聲2》唱將都覺得好開心，劉威煌話今次特別揀咗好多富有香港情懷嘅歌，希望藉由今次個騷可以宣揚香港文化。不過呢日拍攝就發生咗小插曲，就係威煌因為身體抱恙，食咗藥之後唔知醒，爭啲就冇辦法參與拍攝。