九龍城寨之圍城｜郭富城將現身「陳占一家」謝票 電影即日加播彩蛋答謝觀眾

近日掀起全城熱潮嘅動作電影《九龍城寨之圍城》票房節節上升，截至前日6月3號，已經有超過137萬人次入場觀賞，平均每6名港人就有1人入場支持。而電影公司為答謝入場一睇再睇嘅觀眾落力支持，加上應大量觀眾及粉絲要求，以及為潛在觀眾送上迎新禮物，所以即日起喺完片後會播出片段長逾4分鐘嘅「超前導解鎖片段」，大家記得坐定定睇到尾，唔好咁急住走喇！

《九龍城寨之圍城》上映滿一個月，入場人次已超過137萬
 
城寨盛事一浪接一浪，繼日前林峯、劉俊謙、胡子彤、伍允龍化身「九龍城寨福利官」現身見面會，引發千人逼爆商場後，飾演「殺人王」陳占嘅郭富城將會聯同飾演其太太蘇玉儀嘅蔡思韵及飾演兒子陳洛軍嘅林峯，一家三口合體去到多間戲院進行謝票，同觀眾進行近距離見面，各位觀眾要睇實官方資訊搶飛喇！

即日起片尾仲會加入4分鐘長嘅彩蛋，電影公司就呼籲大家咪急住離場喇