再與羅嘉良同框演出勾起觀眾回憶 張鳳妮透露當初拒拍《家族》原因

再與羅嘉良同框演出勾起觀眾回憶 張鳳妮透露當初拒拍《家族》原因

有追開《家族榮耀之繼承者》,就知道張鳳妮飾演嘅二房太太邵家碧,到底同邊個生咗對龍鳳胎,成為劇情推進嘅轉捩點。1987年參加香港小姐而入行嘅張鳳妮,喺97年結婚後就息影移居馬來西亞專注家庭照顧3個囡囡,呢次相隔27年復出拍劇,佢同羅嘉良嘅合作,亦牽起大家《天地男兒》嘅回憶。

呢日鳳妮作客由 潘盈慧 主持嘅《星光路上》,見佢容光煥發,同劇中心事重重個樣完全唔同,佢透露自己肯重拾演戲,除咗因為劇集喺馬來西亞拍攝之外,仲因為被總監製梁家樹嘅誠意所感動。鳳妮話最初劇組聯絡佢時,因為檔期問題,當時囡囡仲未畢業,而且仲考緊一個好重要嘅大學入學試,所以佢一度推咗呢個演出,後來劇組改為7、8月先開拍,鳳妮見囡囡已經考完試,所以佢先答應演出。

相隔27年再拍劇,鳳妮坦言一直以嚟都有人邀請佢復出,但因為佢以家庭為重,想多啲時間陪伴小朋友成長,加上又答應咗老公喺小朋友讀書嘅階段,盡量將時間都畀晒小朋友,所以鳳妮一直以嚟都未有應承。做咗全職媽媽咁多年,鳳妮嘅廚藝已經相當了得,小朋友鍾意食嘅叉燒、海南雞飯等,都成為佢嘅拿手小菜。


鳳妮亦因為呢套劇而認識咗唔少新一輩嘅演員,劇組即使拍攝完畢都經常會有聚會,感情相當好,好似早前一大班人就為佘詩曼慶祝生日喇!至於有傳《家族榮耀之繼承者》將會再開拍續集,鳳妮話自己都有聽過劇組講,佢話如果到時會喺馬來西亞拍攝,而家角色同檔期又啱嘅話,自己都會演出呀。

 相關推薦

熱門搜尋