TVB奧運｜全天候直播奧運各大項目 龐大製作團辦大型記者會倒數

好快今屆巴黎奧運就會正式揭幕，7月26號起舉行嘅體壇四年一度盛事，TVB將會透過各免費頻道，以及 myTV Super 嘅17條頻道播放各個項目嘅精彩賽事，整個運動會期間將播出超過5000小時節目。

文體局局長 楊潤雄 港協暨奧委會會長 霍震霆 仲有TVB節目內容營運總理 曾志偉 等嘉賓，呢日就同主持團隊仲有專業評述團成員一齊參加盛大記者會嘅啟動儀式喇。

TVB喺奧運期間，各頻道播出節目都會作相應調整，唔少劇集同節目將暫停播出讓路，觀眾可以盡情欣賞向項精彩比賽。

今屆 方力申 黃翠如 將身為特派員， 黃庭鋒 孔德賢 鄭衍峰 劉穎鏇 何泳芍 何沛珈 就獲委任成為奧運六星，佢哋仲會走勻全香港，向市民宣傳奧運競技氣氛。小方、翠如同Leonard更會於巴黎當地直擊採訪。

有奧運主持經驗嘅小方就指，擔心自己面皮唔夠厚追訪會失敗，而近日已經開始向認識嘅運動員打定底溝通喇喎。至於早年娛樂主播出身嘅翠如，呢日就謙虛指自己體育活動採訪經驗最少，不過海外拍最多節目嘅佢，相信遇到問題都輕易迎刃而解嘅。

Leonard就預告會拍攝唔同主題為大家提供唔同資訊，而庭鋒過往嘅採訪曾獲盛讚，雖然今次未有機會隨隊，但係佢就話會留守香港為大家帶嚟最新賽果喇。

「萬能鍾」 鍾志光 同 朱凱婷 都係經驗豐富嘅前輩，Tiffany就指要跟兩位前輩偷師好好學嘢，兩位仲即場就傳授第一課喇。

啱啱由佛山開騷返港嘅小方，被指女友 Maple 當日唔止現場欣賞，仲蒙面上台化身舞蹈員伴舞，呢日佢就話自己都唔知，不過睇佢嘅笑容，就似乎對此行有好好嘅回憶咁喇。