J Music | 應智越走出情變風波發福露面 Goo Chan驚喜舊作成情侶表白歌

應智越（細貓）上年被Model前女友大爆二人分手內幕，細貓被指疑似出軌，雖然細貓冇回應出軌事，只係承認二人經已分手，佢亦一直保持低調。日前細貓同音樂人Goo Chan作客《J Music》同一眾主持一齊Jam歌，睇上去心情唔錯。

細貓由於之前唔小心食脹咗，所以要積極做運動減磅，令佢有種感覺好似重返做練習生時期嘅生活咁，同時細貓亦因操得太急，搞到膝頭受傷，需要針灸治療。
 
細貓同Goo Chan呢日合唱新歌《彼岸花》，而呢首歌嘅創作時間其實只係用咗兩日。Goo Chan認為一切歸功於二人有一拍即合嘅默契，由訊息溝通，以少少旋律撞出更多靈感，直到第二日兩人見面，極速完成首歌。
 
Goo Chan日前喺社交平台出Post，好開心自己喺2021年創作嘅歌曲《5am》會成為人哋嘅表白歌曲，令佢感覺自己好似幫咗人咁。Goo Chan迅速寫咗首新歌《5pm》送畀嗰對小情侶，佢亦希望未來可以再寫出一啲有幸福感嘅歌曲給予一對對小情人同夫妻。