眾TVB唱將聯同奧運六星 為巴黎奧運拍攝主題曲MV

下個月26號就係巴黎奧運揭幕嘅日子，TVB將會為觀眾送上全面嘅賽事報道，仲會製作巴黎奧運主題曲為運動健兒打氣。日前一眾聲夢家族就為主題曲排舞拍攝MV，詹天文話上次為東京奧運錄主題曲嘅畫面仍然好深刻，孫漢霖就話上次首歌舞步簡單真接啲，所以今次舞步偏快，自己就要花時間去練。

MV仲有亞洲超星團家族、兩季中年好聲音唱將，以及奧運六星劉穎鏇、黃庭鋒、孔德賢、何沛珈、何泳芍同鄭衍峰參與，冼靖峰經過超星團嘅訓練，舞功進步唔少，相反丁子朗就有啲退步。

奧運六星除咗為盛事宣傳，仲會參與直擊報道，庭鋒就過招畀零經驗嘅Tiffany，話記住睇賽事時唔好太拋入而忘記咗要報道。何沛珈就擔心有大量資料要準備，而陳庭欣就建議佢由北京奧運開始睇，加深對奧運認識。

舞功一向成焦點嘅譚輝智，雖然唔使排舞，但佢都喺鏡頭前一展招牌式舞步，而龍婷為配合主題曲充滿活力，喺髮型上都花心思。周吉佩等人喺事前都為MV做足準備，支嚳儀仲早一日拉根配合做出體操動作。

有份參與錄音嘅唱將中，唔少人都係運動員，文佐匡原來係射擊高手，顏米羔就參與過羽毛球青年軍訓練，而譚輝智同張馳豪都係籃球健將，黃劍文仲話有意參加一項奧運項目。