黃淑蔓生日出新歌男友視角拍MV 出動愛貓演出拒認恨嫁

6月8號生日嘅 黃淑蔓 踏入23歲，仲推出全新Sweet爆情歌《我的受保護動物》同MV，新歌大玩男友視角，講述情侶間嘅甜蜜日常 ，唔止盡顯Feanna可愛一面，仲被對手𠱁到佢心花怒放！

黃淑蔓生日推出新歌《我的受保護動物》

新歌MV喺清水灣一間大宅取景，以男友視角拍攝佢生活日常。身穿居家服嘅Feanna表現鬼馬，一時以喇叭當咪高峰落力獻唱、一時又披上被單原地轉圈，現場笑聲不斷。Feanna仲話以男友視角拍攝MV係自己嘅主意，佢仲話：「如果同我拍拖嘅話，可能就會見到咁樣嘅我，好溫馨、好搞鬼。」

為新歌拍MV時仲突顯佢搞鬼嘅放鬆一面

Feanna仲帶埋愛貓Michi客串演出：「我隻大貓以前已經同我拍過《致未來的我》。今次就輪到我新養嘅貓貓Michi，佢我會同佢喺房拍啲互動嘅Shot。」現場仲有超乖柴犬「阿一」同佢演出對手戲，阿一唔止完成所有指令，就算面對美食當前依然等到Cut機先開口，令Feanna讚口不絕：「佢好乖好合作，係我見過最乖嘅柴犬，雖然佢有少少為食，有啲Chubby，但我好鍾意Chubby嘅嘢，所以我啱啱同『一姐』玩得好開心。」

Feanna嘅愛貓Michi亦客串演出

之後團隊移師沙灘拍攝，Feanna亦以孖辮牛仔造型大曬青春甜美氣息。新歌道盡熱戀中少女心事，Feanna就大讚填詞人 陳詠謙 ，不過其中一句「來日再演妻子跟丈夫」就令Feanna大驚：「好驚大家以為我好想嫁，唔係嘅，純粹係戀愛腦女仔嘅心事。

仲有超級乖巧嘅柴犬阿一出演