師妹VIVA出道張敬軒大方出借豪宅 胡子彤爆紅周街男女友將赴大馬拍劇

張敬軒 胡子彤 呢日同泰國男星 Mew Suppasit Jongcheveevat 一齊現身一個品牌活動，近年一直用盡方法協助行內新人嘅軒仔，近日又傳佢借出豪宅予唱片公司旗下嘅新女團師妹用，難怪佢被稱為「樂壇社工」喇，佢本人就指呢個單位係年前購入收租用，而近來因為租約期滿，加上自己當年居住時運勢不俗，加上師妹需要場地拍攝，於是就大方借用喇。

Tyson Yoshi 近日向拍拖多年嘅女友求婚成功，原來軒仔一早已經知情，仲大讚老友一出冧歌必定成功，仲話之後一定會再親自祝賀一對準夫妻咁話。

至於因為《九龍城寨之圍城》而大受注目嘅胡子彤，近來去到邊都獲市民大叫佢角色名「十二少」打招呼，仲多咗唔少Fans加入胡太行列，呢日佢就有啲怕醜咁話要多謝大家支持，仲有唔少朋友接力示愛，令佢覺得非常鼓舞。

工作停不了嘅佢，由康城影展返港冇幾耐就經常現身謝票，而7月佢就又要飛往馬來西亞拍攝新劇，Tony就話要開始為新角色演出準備，不過期間有需要都一定會返港同大家見面呀。