九龍城寨之圍城｜殺人王一家三口接力謝票 電影票房衝破億元指日可待

熱播電影《九龍城寨之圍城》上映後，已連續38日成為香港單日票房冠軍電影，到星期六為止港澳總票房更已衝破9500萬。電影公司日前加推逾4分鐘嘅解鎖片段回饋觀眾。至於喺片中飾演陳占嘅 郭富城 就同扮演佢太太嘅 蔡思韵 仲有佢哋嘅乖仔「陳洛軍」 林峯 亦終於一家聚首，連續到多間戲院同觀眾近距離見面答謝支持。

殺人王一家三口集合謝票

唔少觀眾睇戲後都期望《龍頭》同《終章》開拍，郭富城就表示《九龍城寨之圍城》票房都口碑都非常好，相信幕後會繼續創作優質故事：「劇本應該會寫我同蔡思韵嘅夫妻感情，仲有同古天樂嘅兄弟情。」佢仲話最重要係香港電影好，連家姐亦因為口碑好而罕有入場觀賞港產片，更大讚戲中所有演員都非常出色。

城城同Cecilia仲非常期待會有更多故事發生

至於同男友 劉俊謙 一齊參與演出嘅蔡思韵，就非常期待有更多演出戲份喇：「我作為占嫂，有可能係好打嘅，因為髮廊中幫手嘅三嬸，都可能係武功最強嘅一個。」郭富城亦笑言殺人王睇得上眼嘅都絕不簡單。

票房連日成為港片之冠，已突破9500萬

而林峯就笑言同「父母」一齊出席謝票非常有趣：「我自己睇完戲先知殺人王爸爸咁利害，亦明白點解陳洛軍打不死，好期待睇《龍頭》，想知爸爸媽媽點生我出來。」