StarTalk一氣呵成版｜林智樂錄新歌波折重重 計劃留港完成大學課程

出道兩年嘅Felix林智樂，作客《StarTalk》接受 主播 許文軒 專訪，分享佢錄製全新主打歌《年輪海》嘅背後故事，Felix話自己出道嗰年，壓力好大，踏入第二年，反而學識放鬆，接受各種挑戰。

佢仲話自己心中有好多好想合作嘅音樂人，而其中一位就係Cousin Fung，最終佢透過 吳業坤 如願向對方邀歌，並收到一曲《年輪海》，Felix話一聽已鍾情，之後放手交比填詞人Oscar創作。不過Felix話自己錄音時不在狀態，好彩獲Cousin不斷嘅指導，令佢有更多幻想嘅空間，從而幫助佢投入狀態，但點知又因為感冒遇上聲帶問題，令Felix錄音過程波折重重。

至於首歌嘅MV，Felix就特登揾嚟林德信參與，因為首歌同時間有關，而時間就好比一塊牛仔布，要經歷裁剪、染、洗水嘅過程，所以當刻就諗到對牛仔布尤其鍾情嘅林德信，於是揾佢客串MV，對方亦爽快答應。而講到拍攝過程，Felix就自爆因為啱啱配好嘅眼鏡，未能如期製成，所以搞到拍攝時，要喺完全模糊嘅視力下進行，所以效果亦未能盡善盡。

講到家人曾反對參加歌曲比賽，Felix話屋企人係希望佢完成大學先追夢，但好彩最後佢哋都願意給予支持，仲經常聽Felix嘅作品添。Felix話自己都計劃緊留港讀大學課程，佢都話有同Chantel交流過呢個問題。