陳豪投資有道再開新分店望衝出香港 教導仔女理財觀念爆阿女最為食

陳豪開嘅咖啡店上月再開新分店，呢日出席活動，佢透露有意衝出香港進軍大馬，希望做生意步步為營，盡量做到收支平衡，陳豪投資有道，亦有教導仔女理財觀念，笑指三個仔女性格上有好大分別。

陳豪目前有畀仔女零用錢，等仔女自己計數，從而觀察仔女消費模式，陳豪見大仔Aiden消費較謹慎，二仔Nathan鍾意買啲平嘢，細女Camilla最願意花錢買美食；講到嚟緊就係父親節，陳豪好期待仔女嘅驚喜，仔女煮嘢或唱歌已令佢開心不已，二仔Nathan最近亦練結他獻唱。