LOONG 9成團後首個香港活動 預告將拍團綜出團歌

人氣男團 LOONG 9成團後首個香港活動終於舉行，12位成員包括 奧利 李權哲 冼靖峰 江信熹 梁詩煜 白子奕 文佐匡 黃奕斌 陳梁 張鎬濂 郭殿甲 同 陳鑫昊一齊現身拍手簽名會，而佢哋嘅粉絲就一早拎好應援物喺商場擺定位等偶像出場，現場氣氛熱鬧。

LOONG 9一出場型爆演唱超星主題曲，睇到fans不停尖叫。呢次可以再同fans見面，12子都非常興奮，分組玩遊戲時佢哋仲不斷賣萌擺甫士，謀殺fans電話嘅儲存空間。

活動上fans嘅尖叫聲就冇停過，先係 陳梁 對住在場fans話好掛住大家，之後又反問fans有冇掛住佢哋，而李權哲就話早兩日拍咗個團綜，當時就學咗句廣東話「我想要啜啜」，搞到台下一眾妹豬發出土撥鼠尖叫。

對於成團後首次嚟到香港出席活動，12子都話好興奮，訪問時李權哲話佢哋喺後台準備時都相當緊張，但當見到fans準備嘅應援物時就覺得好開心。白子奕就多謝大家嚟到現場見佢哋，同時都希望將來可以有更多活動同大家見面。12子又預喬嚟緊將會有新歌同團綜，叫fans好好期待一下，至於問到最想同邊位前輩合作？冼靖峰就話佢哋嘅導師都係佢哋好想合作嘅對象，但同時佢哋都想做多啲屬於LOONG 9嘅作品畀大家呀。 

呢日張鎬濂嘅父母雖然都因為有工作在身嚟唔到現場，但係佢嘅婆婆就有嚟到現場支持孫仔。而早前渡過咗18歲生日嘅奧利，就話生日願意係出一首屬於自己嘅歌呀。