五月天深圳巡唱四萬觀眾送暖 為下月捐骨髓給爸爸女歌迷打氣

台灣天團 五月天 巡唱嚟到深圳站，五月天繼續安排點歌環節圓歌迷夢，當中佢哋讀出一位女歌迷嘅信，表示將於下月要捐骨髓畀爸爸，並指五月天嘅歌陪伴佢走過低潮，希望五月天獻唱《第二人生》送畀佢同爸爸，期盼手術順利迎接全新篇章嘅第二人生。

五月天喺演唱會4萬名觀眾當中，搵到呢位女歌迷樂樂，仲集合全場四萬名觀眾一齊為樂樂同爸爸送上祝福同打氣，當阿信獻唱完歌曲之後，佢就同台下嘅樂樂講，一陣有工作人員會同妳記低聯絡方法，下次五月天嚟深圳開騷，會安排樂樂同爸爸一齊嚟睇騷。

呢番說話令到原本聽完《第二人生》，哭成淚人嘅樂樂，更加係情緒激動。五月天除咗歌曲畀到歌迷力量之外，好多細心行為亦令歌迷有意想不到驚喜，正如阿信喺演唱會上，將手持嘅藍色氣球，送給台下坐輪椅嘅歌迷。