謝霆鋒大馬宣傳逼爆商場 期待與歌神張學友演喜劇

謝霆鋒大馬宣傳逼爆商場 期待與歌神張學友演喜劇

謝霆鋒噚日(9號)聯同導演邱禮濤,為佢聯同張學友、林嘉欣、劉雅瑟主演嘅電影到馬來西亞展開旋風式宣傳,相隔6年再到當地嘅霆鋒,一現身就引嚟超過2千名影迷守候,更加將會場附近街道塞滿人。

見面會上安排咗「告白大會」,有女Fans話見到謝霆鋒喺戲中搏命演出戥佢肉痛,叮囑佢「要多疼愛自己」,謝霆鋒派定心丸話:「我都會盡量(疼自己)啦,都是在很安全之下才拍的。」在場Fans們都話「真的很心疼」,霆鋒就笑笑口話:「這樣我們的目的就達到啦!」 

導演邱禮濤同謝霆鋒到大馬宣傳新片

一位支持咗霆鋒25年嘅鐵粉就興奮話:「我今天終於能跟你說話,我可以跟你合照嗎?」霆鋒原本想講「下次」,但見到台下粉絲「群情洶湧」,佢講咗一句「不如就今次啦」後就直接衝落台,期間有粉絲要求握手,佢亦盡量滿足對方要求。搞笑嘅係,有位女粉絲話想試吓佢嘅手藝,霆鋒打趣叫對方上網去買自家產品,趁機賣廣告。 

當聽到全場粉絲想佢快啲開演唱會時,霆鋒笑笑話:「盡快啦!」霆鋒喺見面會上,提到好開心與「歌神」張學友合作,仲為對方度身打造主題曲《很遠的地方》:「可以合作已經很難得,可以寫一首歌給他更難得。」不過佢就斬釘截鐵話唔會合唱,自己亦冇呢個打算,反而好想同張學友一齊演喜劇。

霆鋒仲話繼今次合作後,想同學友再合作拍喜劇

邱禮濤導演就話當初將動作指導交畀霆鋒負責,係因為對方對動作電影嘅熱誠,霆鋒被問到未來最想挑戰動作場面時,佢就話「如果可以爬Twin Tower(雙子塔),我一定來拍!」謝霆鋒話當年見到辛康納利喺大馬拍攝《偷天陷阱》挑戰爬雙子塔時,覺得對方好大膽:「如果大馬政府給我做,我一定做!」 

佢仲話如果可行希望挑戰於雙子塔拍動作片咁話

今日(10號)係歌神張學友嘅63歲生日,雖然忙緊世界巡迴演唱會,但係一向重視家庭嘅學友都選擇暫時休息吓,好好同家人享受天倫之樂,而細女更加係放假返港陪爹哋過生日。

有份演出嘅學友今日生日,佢選擇留港低調休息同家人度過

 相關推薦

熱門搜尋