葉振棠泰國相會胡慧冲 揭最後願望盼能無憾圓夢

葉振棠(棠哥)早前完成人生首個紅館演唱會，完成封咪儀式。完成紅館騷後，棠哥都開始展開悠閒假期嘆吓世界。去到泰國旅遊嘅佢，就接受咗泰國通 胡慧冲 嘅訪問，暢聊一番。
 
棠哥縱橫樂壇數十年，歌迷遍佈世界各地，所以封咪告別樂壇嘅消息都令大家感到非常不捨。不過棠哥就大派定心丸解釋，佢之所以會宣布退出樂壇，係感到年紀已經好大，而且世事無常。雖然唔會再開個人騷，但有慈善演出搵佢，佢都好樂意唱返幾首，回饋社會。而棠哥亦透露，自己有一個最後願望，就係想做一次世界巡迴演唱會，將好歌再獻一次俾喺唔同地方嘅歌迷，先可以冇遺憾離開樂壇。

棠哥封咪後近日到泰國旅行放鬆
 
喺訪問中，Roger誠邀棠哥列出挈愛嘅五首金曲，棠哥就分別揀咗《忘盡心中情》、《戲劇人生》、《霍元甲》、《笛子姑娘》、《這片葉給你》呢五首。其中《忘盡心中情》可以話係棠哥經典代表作，事關係呢首歌係為佢度聲訂造。而喺6月底紅館騷嘅encore環節，全場萬人大合唱呢首歌嘅場面，都令棠哥非常感動難忘。而棠哥亦分享，錄製《笛子姑娘》完畢先知道，呢首歌係林振強寫嚟紀念病逝妹妹，所以棠哥都一度擔心自己會唔會用錯情感演唱。

同友人飯聚同時接受胡慧冲專訪
 
棠哥早前推出嘅大碟銷量理想，佢亦好感謝劉德華、譚詠麟、張衞健等圈中好友共同獻聲。呢隻碟所籌得嘅善款，都會捐向眼科醫院作慈善用途。

Roger仲獲得棠哥嘅親筆簽名
 
最後講到人生排解不如意事嘅秘訣，棠哥就話，自己相信世上冇事解決唔到，如果有唔開心就唱歌，亦唔會特別去諗負面事情。