許芷熒分享第三次分娩片段 產房臨盆仍緊張儀容髮型

四年抱三嘅2011年港姐季軍 許芷熒 ，近日分享咗一家五口全家福，仍然坐月中嘅佢再喺社交平台上載第三胎臨盆前嘅片段，話要好好記錄一下「應該」係最後一次懷孕嘅回憶。見到Whitney臨入產房前，把握最後機會同大女大仔及老公影大肚相，不過媽媽就相當注重儀容，不停捲髮整頭，話要保持靚樣同細仔影第一張合照。

許芷熒早前誕下第三胎，近日仲分享分娩花絮片段

陪伴在側嘅老公仲好細心幫Whitney按腳同陪產，入到產房，瞓喺產床準備分娩嘅Whitney仲不時問老公啲頭髮有冇攝喺頂帽入面，有冇頭髮飛咗出嚟。見到老婆心情開始緊張，Whitney老公都講啲說話氹老婆開心，當醫生放咗胎水之後，佢就話胎水出咗嚟成個人即刻瘦咗靚晒。

2019年婚後，Whitney同丈夫已經先後育有一女一子，今次已經係家庭第五位成員

Whitney都話生第三胎冇之前咁驚，麻醉過後開七層皮拎BB出嚟時都冇乜感覺，所以感覺好輕鬆。雖然話已經有兩次經驗，不過Whitney都話聽到護士講到要簽輸血同意書時（就係如果喺生產過程中流失太多血液，同意輸血），就會有啲擔心，佢話嗰刻會諗起，其實做開刀手術，都有好大風險，如果有咩事，我幾個BB怎麼辦？

大家姐同二哥歡迎細佬加入