巴黎奧運丨鍾志光連踩5個直播做足近20小時成熱話 親解不眠之謎全賴使命感！

香港奧運代表隊喺巴黎奧運表現突出成績驕人，TVB派出採訪隊直擊賽事，直播室全程有專業評述同奧運主持坐陣，當中已經係第九屆擔任奧運主持嘅鍾志光，近日被網民發現連踩五個直播，但無論幾夜佢都係保持精神奕奕評述賽事。

近日被網民發現連踩五個直播，但無論幾夜佢都係保持精神奕奕評述賽事。

被喻為「萬能鍾」嘅鍾仔親解不眠之謎，佢好感激各界關心，無論係網民、鄰居、街坊都同佢講「你好辛苦呀」，鍾仔就笑笑口話一啲都唔覺得辛苦，只係十幾日，加上坐喺度睇高質素體育節目、又有錢收，兼且做咗幾十年，有得做就做，反正係做自己鍾意嘅嘢，佢話：「因為頭段比較多香港運動員，公司覺得我認識多啲，咁我咪做咯，只係初頭一、兩日嘅情況。前幾晚我哋本來收（凌晨）四點鐘，但最後做到五點半，點解？Vivian張家朗攞金牌喎，一路睇住佢哋比賽，比賽之後又有專訪，嗰個氣氛完全唔會覺得眼瞓！」

被喻為「萬能鍾」嘅鍾仔親解不眠之謎，佢好感激各界關心，無論係網民、鄰居、街坊都同佢講「你好辛苦呀」。

鍾仔透露一早請咗大假喺奧運後休息，加上而家年紀大，返去有一、兩個鐘頭瞓基本上都Ok，因為我年紀大，老人家唔使瞓咁多架喇，佢又指維持精神嘅最好方法係「使命感」：「可能係個使命感啦，個意志令到你頂住嘅，最緊要有精彩嘅賽事。有一日我記得播射擊，但都睇唔到佢射唔射嘅，呢啲就弊喇，好難頂架。」鍾仔又笑言力抗沉悶和睡意的方法，也是和運動有關：「企起身咯，自己鬆吓筋、做吓伸展咯。」

鍾仔笑笑口話一啲都唔覺得辛苦，只係十幾日，加上坐喺度睇高質素體育節目、又有錢收，兼且做咗幾十年，有得做就做。

貴為資深體育主持，鍾仔都慨嘆體育節目無論市場同資源均日益萎縮，齋做體育主持比較難，願意入行嘅人亦日益減少：「體育唔賺錢，因為轉播費太貴。冇得埋怨公司放棄或唔做體育，而係個市場咁樣，一個好實際問題，香港人係咪咁鍾意睇體育呢？依家有氣勢，係因為有香港吖嘛，凌晨四點幾都睇喎，因為嗰個叫張家朗、江旻憓」，「我會覺得可惜，依家已冇得講承傳，其實唔同時間都有啲好出色嘅年青同事入嚟做體育，但依家淨做體育節目會Under Show，同我哋當年唔同，當年做體育爆Show架，有固定節目之餘，再有Extra奧運、亞運、世界盃。（最勁嗰年爆Show爆成點？）大約爆咗300個Show。」

鍾志光本身已擁多個大學院校頒發榮譽學士、碩士等高等學歷認證，早前獲香港教育大學頒發榮譽院士銜。鍾志光係利物浦球迷，從沒掩飾對利物浦嘅欣賞。