錢小豪親解暴瘦40磅因由 證實頭部生黑斑急檢查無礙

年屆61歲嘅武打影星 錢小豪 日前喺直播時因為身形突然消瘦，令大家都擔心佢嘅健康狀況，仲有傳佢患癌，亦揣測佢身患嚴重糖尿病至激瘦40磅。呢日佢現身台灣出席慈善活動時，鮮有開腔透露身體情況，表示目前體重大約有63公斤，雖然比年青時清減，但係強調自己好健康同好開心：「我最重的時候有80公斤，現在大約有63多、64公斤，是因為疫情時我吃得不好，可能一天只吃兩個雞蛋，習慣了就吃不下，現在喜歡吃素，大塊肉也吃不下。」

錢小豪早前被指暴瘦，之後仲傳出佢患重病嘅消息
小豪仲強調每年都有做身體檢查，三個月前才驗過身，心肺、血管、腸胃一切正常，除咗眼睛有小毛病，出現青光眼，要定時滴眼藥水但無需做手術。
不過呢日佢就指自己非常健康，月前先驗過身無大問題

被問曾剃光頭被傳頭部有黑斑疑似有癌症接受化療，小豪哥坦言頭部的確有黑斑、仲係由髮型師發現，不過經過醫生檢查後發現只係老化現象並無大礙，剃光頭亦只係方便檢查同抽組織檢驗。

對於被傳患癌，小豪亦採一笑置之態度，未有特別解釋同澄清，反而好感恩黃秋生呢位小學同學發文慰問，小豪哥亦閃回呢位老友，多謝對方關心。