麥翠嫻大女出嫁榮升外母恨抱孫 劉少君葉子楣于洋到賀

10月20號係嫁娶好日子，分別有兩位星二代出嫁成為人妻，湯鎮業大女湯愛嘉（Isabella）舉行婚禮，好友劉嘉玲及苗僑偉到賀，而麥翠嫻大女龔敏晴亦同男友拉埋天窗，葉子楣、于洋、劉少君、魏秋樺同吳大強等出席。

麥翠嫻榮升外母難掩興奮心情，佢感謝朋友由美國、上海等地買機票返港特登嚟飲，令麥翠嫻覺得好感動，麥翠嫻亦坦言好恨快啲抱孫；好友劉少君為婚宴出心出力，佢同麥翠嫻相識幾十年，呢日好似自己嫁女咁，劉少君一早已到場打點，希望世姪女有一個開心嘅晚上。

葉子楣同麥翠嫻相識近40年，親眼見證世姪女出嫁，葉子楣戥一對新人開心，指自己未試過結婚，見到呢個場面會好感動，祝一對新人百年好合、永結同心。葉子楣除咗拍戲之外，仲有搞酒店生意，嚟緊佢12月再去檳城，睇第二間酒店嘅動土儀式。