StarTalk丨周吉佩因工作與太太相處摩擦多 年紀逐大需要更多休息時間

歌手周吉佩（吉吉）等咗16年終於舉行人生首個個人演唱會，以第三人生作為主題，吉吉接受TVB娛樂新聞台節目《StarTalk》訪問，與主播許文軒講吓工作及家庭點樣分配時間。

吉吉早前為個唱拍攝海報
吉吉指呢次開騷源自一隻紙飛機，而第一人生係自己初出道、第二人生就係樂隊嗰時、而家見證埋第三人生，吉吉坦言太太辭工專注做幕後軍師，確係因工作同太太相處摩擦多咗。
太太已辭去原本工作為佢擔任幕後軍師

吉吉指以前同太太喺屋企多數傾小朋友嘢，反而目前相處比較似拍檔，多咗講公事上嘅嘢，譬如音樂學校事宜、event安排，甚至音樂曲風都會畀意見，吉吉稱上一首歌《聲音的餘溫》係由太太揀，目前兩公婆溝通上離唔開吉吉嘅工作及音樂，有時各持己見，難免摩擦多咗。
新歌MV仲邀請袁富華參與演出

對於工作量多咗，吉吉坦言一對仔女卻不停投訴，少咗時間陪伴，指一對仔女唔想自己做歌手，但係吉吉知道仔女好錫佢，每次出新歌，仔女都會練唱，吉吉雖然忙於籌備演唱會，不過佢都希望喺時間上安排好啲、多啲時間同小朋友相處，更揀咗每日凌晨先做Gym，又指自己年紀漸大，需要更多休息時間。