衛詩雅獲贈鑽石頸鏈結婚禮物 關智斌獲粉絲送半裸騷肌手機殼

關智斌（Kenny）同衛詩雅（Michelle）日前驚喜快閃珠寶店，作為婚嫁系列代言人嘅Michelle獲老闆楊受成送上鑽石頸鏈，祝賀佢即將出嫁；Kenny亦獲老闆送上算盤金牌，認真大手筆。

Michelle原本打算去珠寶店，順道為明年二月舉行嘅婚禮添購首飾，原來老闆早有準備，送鑽石頸鏈畀Michelle結婚嗰日戴，Michelle大呼感動即刻多謝老闆，佢笑言：「我老公都冇送過咁貴重嘅禮物畀我。」老闆即刻笑問：「你老公會唔會呷醋先？」老闆又贈送Kenny一塊算盤形嘅金牌頸鏈，Kenny笑言：「老闆知我孤寒，知我喺度計數！」

快閃完珠寶店，Kenny隨即去隔籬舉行簽名會，雖然當日掛三號風球，不過無阻現場四百名fans，佢哋仲送咗好多破格禮物畀Kenny，包括運程書、鑊鏟廚具、Kenny半裸爆肌嘅電話殻等，令Kenny哭笑不得：「呢個手機殼點樣出街用㗎 ？啲人會話你變態喎。」Kenny坦言之前十分擔心fans，好彩雖然掛三號波，但冇落雨，令簽名會順利舉行。