容祖兒聲帶受損後將調節工作 會繼續參與聲生不息港樂季2

容祖兒（Joey）早前返鄉下江門參與一個音樂會，因為失聲無法獻唱，呢日佢返港出席活動時親自解釋聲帶狀況，佢話聲帶長期有繭，磨擦得多要做手術，今次經休養後現時仍未完全痊癒，所以要戒口，唔可以食最愛嘅花生、餅乾、食辣同凍飲等，仲唔可以講太多嘢，對於健談嘅Joey來講都好辛苦，但佢為咗聲帶着想會加倍努力。

容祖兒呢日回港出席活動。
Joey呢日狀態仍然聲沙沙，重提當晚Joey只能夠喺播住音樂上台向歌迷鞠躬致意，但就引起部分觀眾不滿，甚至喺現場大嗌退票，Joey話可以理解觀眾嘅心情，因為觀眾可能因為佢遠道而來，睇唔到會覺得可惜，但亦希望歌迷理解邊個想病，仲要病到咁嚴重，自己都希望儘快好返，來日方長，或許仲有機會到當地演出。
祖兒呢日狀態仍然聲沙沙。
Joey話今次聲帶亮警鐘，令佢下定決心短期內唔會再接新工作，不過之前安排定嘅工作包括《聲生不息港樂季2》，佢依然會盡力做到最好，希望觀眾會接受佢喺唔同狀態之下嘅真實感。

祖兒指會盡力做好《聲生不息港樂季2》。