羅力威喺2018年娶太太雨僑後，二人育有一對子女，最近自資出新歌，佢接受電台訪問時透露夫妻收入主要來自雨僑網店，羅力威都有幫手管理吓生意，三年前約滿英皇後，相隔5年轉做獨立歌手，回想神隱呢段時間，家庭經歷多重巨變，羅力威及雨僑誕下大女Harper初期，外母同時發現患癌，再加上囡囡患有「高敏症」，令一對新手父母由喜變悲，而家三歲大嘅Harper高敏症改善，開始入學，羅力威坦言目前先多咗時間重投音樂創作。
羅力威剖白暫別樂壇5年因由，當講到當年同屆歌唱比賽嘅戰友古淖文冒起，羅力威由衷咁戥古淖文開心：「古淖文係天生屬於舞台，每一個識佢嘅朋友都知。就算去茶餐廳，都登台咁嘅款，哈！好王者姿態咁叫餐蛋治。而我好清楚自己要啲乜嘢、鍾意啲乜嘢。譬如如果有人叫我參加《中年好聲音》，我唔會答佢我去定唔去，我只可以回應，呢個人並唔了解我。」
羅力威新歌MV揀咗喺長洲學校拍攝，而雨僑母親曾任長洲學校教師，2023年因癌病離世，佢指大女Harper出世初期，本來好開心，但外母幫手湊孫嗰陣突然好辛苦，再去做身體檢查就發現患癌，再加上阿女患有高敏症。羅力威話原本諗住三代同堂好開心，但突然成件事反轉晒，自己要做好照顧者兼安慰者嘅角色，睇見太太都好心痛，羅力威指大女而家3歲大，高敏症改善及開始入學。
雨僑早前曾喺社交平台分享照顧高敏感女兒Harper時嘅艱辛，指阿女每日要以同樣生活方式生活，一接觸新事物或去新地方必定崩潰。「高敏感」特質並唔係心理疾患，只係對接收到外在環境嘅刺激，神經系統較敏感，能夠敏銳覺察，注意到許多別人冇留意嘅細節，因此處理資訊上較為深入，思考問題層面較廣，不論正向或負向感受都會被放大，自身情緒易被影響，同時具有較高嘅同理心，對發生喺別人身上嘅事物更能感同身受。