齊集幾大視帝演出嘅《執法者們》完美結束，一眾台前幕後相約食飯睇大結局，大家紛紛起鬨要求開拍續集，氣氛溫馨又熱鬧。
劇中黃宗澤同 蔡潔 經歷生離死別，睇到觀眾意難平，馬國明就建議公司快啲開套新劇俾佢兩個再續前緣， 丁子朗 亦提議蔡潔可以同Bosco情侶檔接job搵真銀。
陳豪 就話好開心今次可以同咁多位型男視帝合作，尤其呢套劇結合ICAC、警匪同法庭三種題材，唔止觀眾有福，自己演起上嚟都特別過癮。
吳啟華今次喺劇中飾演終極Big Boss，佢就透露係自己嘅選擇，因為幾乎全套劇都可以做好人，直到最後先揭曉其實係壞人。自己嘅角色雖然死咗，不過如果開拍續集，佢都希望可以有份演出第二個角色。
丁子朗今次喺劇中嘅造型有唔少人大讚好靚仔，馬明仲建議公司開拍《男神配對計劃》俾丁丁參加，蔡潔仲建議Bosco都可以玩埋一份。而Bosco都表現出超高意願，話晒可以攞正牌一次過同三個女仔拍拖，都真係幾過癮。