梁敏巧 李芷晴 羅毓儀 葉蒨文 同 關嘉敏 仲有多位求愛勇者每個星期都喺《女神配對計劃》追逐愛情，而身為主持嘅阿Bob，就於社交平台解答觀眾對節目近來嘅疑問喇，阿Bob寫道：節目已經差唔多播咗一半，能夠成為近年其中一個收視同口碑都幾好嘅節目，真係要好多謝咁多位觀眾同埋網友嘅支持。
最近喺網上同埋其他平台見到好多留言同埋討論，雖然我唔能夠代表晒節目組同製作組，但係我都想以主持人嘅身份去回應一下。
1. 個節目可唔可以長啲？
除咗每年都有嗰啲大show或者一啲特備節目之外，絕大部份嘅綜藝節目最多都係一個鐘頭，我都好明白係好難滿足晒所有人，如果個節目變到兩個鐘頭一集，出街嘅時候大家睇落又未必有而家咁緊湊，可能到時又會有唔少嘅朋友會覺得太長氣，好悶，所以而家一個鐘頭一集，相信已經係最好嘅安排。
2. 可唔可以唔好一個禮拜一集？
因為呢一個係一個戀愛綜藝節目，其實同好多比賽類或者選秀型節目差唔多，都係一星期一次，等大家討論吓，維持個追看性，所以就放咗喺星期日呢一個黃金時段去播放，而電視台嘅節目表，絕大部份都係一早已經排好晒，不過聽到大家嘅意見，我哋都會努力嘗試，睇吓有冇機會爭取作出相應嘅調動，但因為仲有好多相應嘅難題需要克服，例如拍攝時間、剪接時間等等，所以未必一時三刻就能夠改動。
3. 做乜無啦啦搞踢館？
其實呢個真係唔係無啦啦嘅，喺節目開拍嘅時候，監製同編審都已經講過有呢個後備嘅方案，只要節目有一啲突發嘅情況出現就會啟動，而家大家應該啱啱都睇到，所有人入咗個營地度拍攝，喺呢兩日一夜入面，發生咗好多意想不到嘅事情，我唔係扮晒賣關子，跟住嗰三四集大家繼續睇就會明，為咗令到其中某幾組可以繼續順利拍攝同參與，製作組必須要參考其他地方電視台嘅戀綜節目，加入踢館呢個元素，女神先至可以有更多選擇，當然佢哋亦都考慮到增加成件事嘅可觀性同娛樂性，所以早前先至再有公開招募呢個安排。
最後，好想衷心地話俾大家知，時間上同埋拍攝上嘅安排，唔係為咗去吊你哋癮，確實有太多技術上同埋實際上嘅因素要克服，例如要集齊五位女神同埋咁多位參加者一齊去拍攝，淨係度期都已經係一件非常困難嘅事，因為佢哋唔係某啲國家嘅戀綜節目咁，人哋大部份都係出面請返嚟嘅Model，我哋嗰啲男參加者真係素人，佢哋都要返工，所以希望大家體諒我哋未能夠好頻密咁樣去拍攝。
而踢館呢件事，亦都無意專登去整式整水搞花臣，主要想帶出真愛係唔會受到其他人嘅引誘同挑戰。
我哋真係好希望呈現一個最赤裸最真實嘅真人show，俾大家見到我哋係一個好用心去製作嘅團隊，為大家帶嚟一個有水準嘅戀愛綜藝節目。
各位觀眾同網友，請繼續支持《女神配對計劃》，多謝晒你哋每一位
《女神配對計劃》星期日晚 21:30 翡翠台