《女神配對計劃》話咁快就嚟到第8集，繼續係Dating Camp心意配對遊戲，而經過閨密花生團嘅一致決定，兩名求愛勇士Issac同Henry都被淘汰。
而喺上集「荒島求生」中盡顯默契兼甜度指數爆標嘅GM曾展望同Sophie葉蒨文，喺呢集更有突破性嘅發展。GM有機會同女神Sophie鼻尖碰鼻尖10秒嘅獎賞任務。鏡頭前嘅佢哋突然變成一對心如鹿撞嘅小情人，火花四濺。
Sophie坦言覺得好怕醜，佢話自己平時對住其他男仔，都會表露咗強勢大女人嘅一面，但係對住GM時，男方嘅佻皮令佢突然變成小鳥依人嘅小女孩呀。
相反另一位女神 李芷晴 就因為玩「心意配對遊戲」期間經常獨守空房，搞到佢都一時感觸，忍唔住喺阿Bob面前淚崩，「我會有少少覺得係咪我真係要檢討一下，會唔會諗嘢有啲奇怪？」
芷晴話自己一向對愛情充滿憧憬，但一直以嚟都未找到好了解自己或好適合嘅人，係咪自己對愛情太理想化？所以佢都話好擔心自己將來會唔會孤獨終老。
