由「日本通」 杜如風 主持嘅旅遊節目《解風東京2》即將同大家見面，繼續帶觀眾瘋狂食、買、玩！但向來鍾意血拼一番嘅杜如風就竟然轉死性，話自己「大個女」成熟咗，今趟旅程冇再買得咁瘋狂。
杜如風仲話，自己去日本拍攝前咁啱要搬迷你倉，由一個倉變兩個倉，邊執邊發現有好多嘢未拆就已經要拎去捐，覺得好可惜，所以有新領悟，覺得既然有咁多衫仲未拆，就著埋先再買新。
拍攝旅途中，攝影組接連有人生日，令杜如風食咗唔少蛋糕。講到呢一次食過最平靚正嘅地道美食，杜如風就話係一款用300條鰻魚熬成湯底嘅鰻魚拉麵，新鮮足料到好似媽媽靚湯咁，自己一口氣飲晒啲湯。
雖然日食夜食，又可以寓工作於娛樂，但杜如風都落足力做運動，喺行前積極瘦身，令成個行程食得再多都唔驚。講到減肥方法，佢就話係「忍口」，一日食一餐，然後不停跑步。
杜如風好友何超儀老公陳子聰緊急赴美國做手術，令外界都好擔心子聰身體情況。杜如風都有向好友送關心慰問，亦同大家講唔洗擔心。