旅遊節目《玩轉粵東粵北懶人包》由薛家燕帶隊，聯同羅天宇、何沛泇、冼靖峰、關楓馨、黃美棋幾位活力十足嘅主持玩轉廣東省嘅普寧、梅州、惠州、河源、汕尾、清遠等地，節目會喺下個星期一（8月4號）起，逢星期一至五晚十點半播出。內地美食多不勝數，連家燕姐都話食到增咗磅而歸。雖然行程緊密，但有一眾後輩同行，家燕姐沿途備受照顧，享受到女王級待遇！
至於Archie就被家燕姐話係全團之中「最擦得」嘅人，埋頭密密食之餘，仲一個人食曬成碟雞。不過Archie解釋，因為一隻雞有唔同部位，佢要試到最好，將最好嘅嘢留俾家燕姐。何沛泇就話Archie喺開拍前同自己講：「沛泇，唔使擔心，你唔記得嘅嘢我都會幫你講曬佢。」點知最後Archie冇點講嘢，只係不停食。
美棋同天宇因為呢次合作變成生死之交，佢哋一齊喺清遠嘅古龍峽體驗漂流，美棋話一開始以為係好舒服嘅活動，點知落到去坐咗一陣，佢已經想打退堂鼓。天宇就話第一個圈衝落去嘅時候，美棋已經落咗水底唔見咗，自己其實都好驚，但天宇又覺得，因為自己係男仔，所以要撐住，所以最後係同美棋一齊攬住玩完呢個體驗。
《玩轉粵東粵北懶人包》8月4號起，逢星期一至五 22:30 播出
